04-07-2011
ការបោះឆ្នោតក្នុងប្រទេសថៃទើបតែបញ្ចប់ថ្មីៗនេះ។ លទ្ធផលបានបង្ហាញថា គណបក្សប្រឆាំង ភឿថៃបានឈ្នះសំលេងដ៏លើសលប់លើគណបក្សកាន់អំនាចពីមុន ដែលដឹកនាំដោយលោកអាប ភីស៊ីត។
ជោគជ័យរបស់គណបក្សភឿថៃ បានធ្វើឲ្យមានកំណត់ត្រាប្រវត្តិសាស្ត្រលើកដំបូងក្នុងប្រទេស ដែលរដ្ឋាភិបាលប្រទេសនេះដឹកនាំដោយស្ត្រី។
គណបក្សសមរង្ស៊ីបានសំដែងនូវការសាទរ ដ៏ស្ម័គ្រស្មោះចំពោះជោគជ័យរបស់គណបក្សប្រឆាំង ក្នុងប្រទេសថៃនាពេលនេះ។ ជោគជ័យរបស់អ្នកប្រឆាំងក្នុងប្រទេសថៃ គឺជាសញ្ញាណដ៏វិជ្ជមាន ចំពោះកំលាំងប្រឆាំងក្នុងប្រទេសកម្ពុជា ដែលមានវប្បធម៌ស្រដៀងគ្នា មានប្រទេសនៅក្បែរគ្នា។
គួរកត់សំគាល់ថាប្រជាពលរដ្ឋខ្មែរ និងប្រជាពលរដ្ឋថៃ ចង់ឲ្យមានការផ្លាស់ប្តូររបបដឹកនាំ ដោយត្រូវជ្រើសរើសយកអ្នកថ្មី ជាសំលេងប្រឆាំងដែលដឹកនាំដោយអ្នកស្នេហាជាតិ ស្អាតស្អំ និងមានសមត្ថភាព។
ពលរដ្ឋខ្មែរ និងពលរដ្ឋថៃត្រូវការនូវភាពយុត្តិធម៌ក្នុងសង្គម ចង់ឲ្យមានការកាត់បន្ថយគំលាតរវាងអ្នកមាន និងអ្នកក្រ គំលាតរវាងប្រជាពលរដ្ឋអ្នកទីក្រុង និងអ្នកជនបទ និងចង់ឲ្យមានការអនុវត្តដោយជោគជ័យនូវគោលនយោបាយកាត់បន្ថយភាពក្រីក្រក្នុងប្រទេស ដែលគណបក្សកាន់អំណាច ដឹកនាំដោយមនុស្សគ្មានសមត្ថភាពមិនអាចធ្វើបាន។
ទាំងអស់នេះហើយដែលធ្វើឲ្យមានការផ្លាស់ប្តូរក្នុងរបបនយោបាយប្រទេសថៃ ហើយវាក៏ជំរុញឲ្យមានការផ្លាស់ប្តូរក្នុងប្រទេសកម្ពុជានាពេលខាងមុខផងដែរ។ ការបោះឆ្នោតក្នុងប្រទេសកម្ពុជានឹងចូលមកដល់នៅឆ្នាំ២០១២ សំរាប់ការបោះឆ្នោតរើសមេដឹកនាំរដ្ឋាភិបាល។ ប្រជាពលរដ្ឋកម្ពុជានឹងធ្វើការផ្លាស់ប្តូរ ដោយសារលក្ខ័ណ្ឌ រស់នៅដ៏សែនលំបាកក្នុងរបបដឹកនាំបច្ចុប្បន្ន។ មានភាពអយុត្តិធម៌ ដែលធ្វើឲ្យប្រជាពលរដ្ឋត្រូវរស់នៅក្នុងសភាពភ័យខ្លាច ការរំលោភដីធ្លី ធ្វើដោយបុគ្គលមានអំណាចដើម្បីប្រយោជន៍ក្រុមខ្លួន ហើយមិនត្រូវបានយកចិត្តទុកដាក់ដោះស្រាយដោយសារតែមានជាប់ពាក់ព័ន្ធនឹងទំនាស់ផលប្រយោជន៍ ការបំផ្លាញទ្រព្យសម្បត្តិជាតិ ដោយមិនគិតពីអនាគតទ្រព្យសម្បត្តិទាំងអស់នោះ ដើម្បីតែប្រយោជន៍ខ្លួន ការបណ្តែតបណ្តោយឲ្យប្រទេសជិតខាងឈ្លានពានដីខ្មែរ ដោយមិនប្រើប្រាស់វិធានការណ៍ដ៏មានប្រសិទ្ធភាព ការធ្វើឲ្យមានគំលាតកាន់តែខ្ពស់រវាងអ្នកមាន និងអ្នកក្រ និងអំពើពុករលួយ ទាំងនេះជំរុញឲ្យប្រជាពលរដ្ឋខ្មែរ ដែលមានឪកាសត្រឹមតែប្រាំឆ្នាំម្តងប៉ុណ្ណោះ ត្រូវធ្វើការផ្លាស់ប្តូរតាមរយៈសន្លឹកឆ្នោតរបស់ខ្លួន ដើម្បីស្វែងរកភាពយុត្តិធម៌សង្គម និងការរីកចំរើនពិតប្រាកដ ដោយជ្រើសរើសយកសំលេងគណបក្សប្រឆាំង ដែលមានសមត្ថភាពនិងស្នេហាជាតិពិតប្រាកដ ដូចការផ្លាស់ប្តូរក្នុងប្រទេសថៃ។
ការដឹកនាំប្រទេស ដែលប្រកាន់បក្សពួក ដឹកនាំដោយ ឈ្មួញ អ្នកឧកញ៉ា ដែលមានប្រភពចេញពី គណបក្សប្រជាជនកម្ពុជាសព្វថ្ងៃ មិនបានធ្វើឲ្យប្រជាពលរដ្ឋខ្មែរនៅគ្រប់ទិសទីទទួលបានយុត្តិធម៌ពិតប្រាកដនោះទេ ផ្ទុយទៅវិញ ការរំលោភដីធ្លី ការបែងចែកទ្រព្យសម្បតិ្តជាតិ និងធម្មជាតិ កំពុងកើតមានឡើង ដើម្បីទាញយក ផលប្រយោជន៍ផ្ទាល់ខ្លួន និងធ្វើការបែងចែកឲ្យក្រុមបក្សពួករបស់ខ្លួនយ៉ាងសកម្ម និងមានការ លាក់កំបាំងបំផុត។ សកម្មភាពទាំងអស់នេះហើយដែលធ្វើឲ្យអ្នកមានអំណាច និងបក្សពួករបស់គេកាន់តែមានទ្រព្យសម្បត្តិស្តុកស្តមទៅៗ ស្របពេលដែលប្រជាពលរដ្ឋខ្មែរខ្លះ រកអាហារបរិភោគស្ទើតែមិនបាន។ ទាំងអស់នេះហើយ ដែលជាហេតុផលដែលប្រជាពលរដ្ឋខ្មែរ ត្រូវធ្វើការផ្លាស់ប្តូរ។
គណបក្សសមរង្ស៊ីក្នុងកាលៈទេសៈណាក៏ដោយបានឈឺឆ្អាលចំពោះសុខទុក្ខរបស់ប្រជាពលរដ្ឋជានិច្ច។ គេតែងបានសង្គេតឃើញវត្តមានរបស់តំណាងរាស្ត្រ និងតំណាងរបស់គណបក្ស សម រង្ស៊ី នៅគ្រប់ទីកន្លែង ចូលរួមជាមួយប្រជាពលរដ្ឋ ដើម្បីតស៊ូទាមទាររកយុត្តិធម៌ ប្រឆាំង អំពើជិះជាន់នានា និងការបណ្តេញប្រជាពលរដ្ឋ។ ទាំងក្នុងវេទិកានៅមូលដ្ឋាន និងក្នុងវេទិកាថ្នាក់ជាតិ គណបក្ស សម រង្ស៊ី បានចេញមុខធ្វើការតស៊ូមតិដ៏ប្តូរផ្តាច់ ដើម្បីការពារប្រជាពលរដ្ឋ និងទប់ស្កាត់ដាច់ខាតការប្រើប្រាស់កងកំលាំងធ្វើការគំរាមកំហែងពលរដ្ឋដោយហឹង្សា និងទប់ស្កាត់ការវិលត្រឡប់មកវិញនៃរបបផ្តាច់ការ លើសពីនេះគណបក្ស សម រង្ស៊ី បានធ្វើសកម្មភាពយ៉ាងសកម្មក្នុងការការពារទឹកដីខ្មែរទល់នឹងប្រទេសជិតខាង ដែលមានចេតនារំលោភចូលដីខ្មែរ ទាំងកំរោល និងវិធីត្រជាក់ក្តី។ គណបក្ស សម រង្ស៊ី ដឹកនាំដោយលោកប្រធាន សម រង្ស៊ី ជាក្តីសង្ឃឹមតែមួយគត់របស់រាស្ត្រខ្មែរ។ គាំទ្រគណបក្ស សម រង្ស៊ី នឹងមានការផ្លាស់ប្តូរដ៏ធំនៅកម្ពុជា៕ កង ប៊ុន
