28-06-2011
សមាជិកក្រុមប្រឹក្សាគណបក្ស សម រង្ស៊ី និងក្រុមប្រឹក្សាជាប់ឆ្នោត មកពីខណ្ឌ៧មករា និងខណ្ឌសែនសុខចំនួន៦៥នាក់ បានជួបប្រជុំគ្នានៅល្ងាចថ្ងៃសៅរ៍នេះ នៅទីស្នាក់ការកណ្តាលគណបក្សរាជធានី ក្រោមការដឹកនាំដោយលោក ហូរ វ៉ាន់ ប្រធានក្រុមប្រឹក្សាគណបក្សនិងមានការចូលរួមដឹកនាំដោយលោកស្រី លី ស្រីវីណា តំណាងរាស្ត្រមណ្ឌលភ្នំពេញ និងលោក ឃី វណ្ណដេត តំណាងរាស្ត្រមណ្ឌលកំពង់ឆ្នាំង ។ លោក ហូរ វ៉ាន់ ប្រធានក្រុមប្រឹក្សាគណបក្សរាជធានភ្នំពេញ បានមានប្រសាសន៍ថា គោលបំណងនៃការជួបជុំគ្នានេះ គឺដើម្បីស្តាប់នូវរបាយការណ៍ របស់បណ្តាសមាជិកក្រុមប្រឹក្សាគណបក្សខណ្ឌ ដែលបានធ្វើនាពេលកន្លងមក និងការវាយតំលៃ ដើម្បីកំណត់យុទ្ធសាស្ត្រអនុវត្តការងារបន្តទៀតក្នុងការជួយការពារប្រជាពលរដ្ឋ និងតាមដានការអនុវត្តតួនាទីរបស់អជ្ញាធរក្នុងការងារអភិវឌ្ឍខណ្ឌ និងសង្កាត់ ។
ថ្លែងចូលរួមក្នុងកម្មវិធី លោកស្រី លី ស្រីវីណា បានបញ្ជាក់ថាក្រុមប្រឹក្សាខណ្ឌ សង្កាត់របស់គណបក្សសមរង្ស៊ី ពិតជាមានតួនាទីសំខាន់ណាស់ក្នុងការជម្រុញ និងតាមដានការអភិវឌ្ឍនៅមូលដ្ឋាន ដែលឆ្លើយតបទៅនឹងតំរូវការរបស់ប្រជាពលរដ្ឋ ។ បើគ្មានក្រុមប្រឹក្សារបស់គណបក្ស សម រង្ស៊ី អជ្ញាធរ ដែលក្រោមការដឹកនាំដោយមនុស្ស របស់គណបក្សកាន់អំណាចសព្វថ្ងៃ នឹងឆ្លៀតធ្វើសកម្មភាពតាមអំពើចិត្ត ដែលមិនបំរើដល់ឆន្ទៈរបស់ប្រជាពលរដ្ឋគ្រប់គ្រាន់ ប៉ុន្តែផ្តល់ ផលឲ្យតែក្រុមមនុស្សមួយចំនួនតូច ដែលជាក្រុមបក្សពួករបស់គេ និងអ្នកដែលមានអំណាចខាង លើគេប៉ុណ្ណោះ។ ដូច្នេះតំណាងរបស់គណបក្សសមរង្ស៊ីត្រូវតែធ្វើសកម្មភាពបំរើដល់ប្រជាពលរដ្ឋ ពិតប្រាកដ ព្រោះប្រជាពលរដ្ឋជាម្ចាស់អំនាច ជាអ្នកបោះឆ្នោតឲ្យ ហើយត្រូវប្រឆាំងដាច់ខាត រាល់គំរោងណា ដែលជះផលប៉ះពាល់ដល់ការរស់នៅរបស់ប្រជាពលរដ្ឋ និងមិនឆ្លុះបញ្ជាំងពី ប្រយោជន៍រួម ។
នៅកម្មវិធីដ៏មានសារៈសំខាន់នោះផងដែរ លោកប្រធាន សម រង្ស៊ី ក៏មានវត្តមានចូលរួមតាមរយៈ វីដេអូខន់ហ្វឺរ៉េនខណៈរូបលោកកំពុងមានវត្តមាននៅប្រទេសបារាំង ។ ដោយការនឹករលឹកចំពោះ សមាជិកក្រុមប្រឹក្សាគណបក្សដែលមានមានវត្តមាន លោកប្រធាន សម រង្ស៊ី បានជំរាបប្រាប់អំពី សកម្មភាពការងាររបស់លោកដែលកំពុង នឹងបានធ្វើលើឆាកអន្តរជាតិ ដើម្បីប្រឆាំង និងស្វែងរក យុត្តិធម៌ជូនសង្គមជាតិខ្មែរ ដោយលោកថាកុំឲ្យមានការព្រួយបារម្ភ ព្រោះអ្វីដែលលោកធ្វើបាន ទទួលការគាំទ្រយ៉ាងពេញទំហឹង ។ ដូច្នេះលោករំពឹងថា សមាជិក្រុមប្រឹក្សាគណបក្សទាំងអស់ មិនមានការព្រួយបារម្ភ ហើយនៅតែបំពេញការងាររបស់ខ្លួននៅតាមមូលដ្ឋានជាធម្មតា ដើម្បីការពារប្រជាពលរដ្ឋ និងស្វែងរកសំលេងគាំទ្រឲ្យគណបក្ស ។ លោកប្រធាន សម រង្ស៊ី បានបញ្ជាក់ទៀតថាសកម្មភាពការងារ របស់សមាជិកក្រុមប្រឹក្សាគណបក្ស សម រង្ស៊ី ទាំងអស់ គឺជាសកម្មភាព ដ៏មានតំលៃ ធ្វើដើម្បីប្រទេសជាតិ និងប្រជាពលរដ្ឋសុទ្ធសាធ ។
លោកប្រធាន សម រង្ស៊ី បានធ្វើការកត់សំគាល់ទៀតថា បច្ចុប្បន្ននេះរដ្ឋាភិបាលកម្ពុជាបានធ្វើឲ្យប្រជាពលរដ្ឋខ្មែរនៅគ្រប់ទីកន្លែងរាប់សែនគ្រួសារ ទទួលរងគ្រោះដោយការបណ្តេញចេញពីដីធ្លី ។ ក្នុងកាលៈទេសៈនេះក្រុមប្រឹក្សាគណបក្ស សម រង្ស៊ី ទាំងអស់ ត្រូវតែរួមគ្នាធ្វើការតស៊ូជាមួយ ប្រជាពលរដ្ឋ ប្រឆាំងដាច់ខាត ដើម្បីការពារប្រជាពលរដ្ឋ ដោយចាត់ទុកថាដីធ្លីជាអាយុជីវិតរបស់ពួកគាត់ ។ បើកាលណាដីធ្លីត្រូវបានរំលោភយកដោយក្រុមហ៊ុនខិលខូច និងអ្នកមានអំណាចមួយចំនួន មានន័យស្មើនឹងការសំលាប់ប្រជាពលរដ្ឋ ។ ដូចនេះគណបក្ស សម រង្ស៊ីមិនអាចឈរមើលបានទេ គឺត្រូវតែចូលរួមជាមួយប្រជាពលរដ្ឋ ដើម្បីការពារដីធ្លីទាំងអស់នោះ ដោយគ្មានការរើសអើង ។
គួររំលឹកថា ដោយការឈឺឆ្អាលអំពីបញ្ហាជីវភាពរស់នៅរបស់ប្រជាពលរដ្ឋនៅគ្រប់ទីកន្លែង កន្លងមកគេសង្គេតឃើញមានតែវត្តមានរបស់តំណាងគណបក្ស សម រង្ស៊ី ប៉ុណ្ណោះ បានចេញមុខ ធ្វើអន្តរាគមន៍ ពិសេសលើបញ្ហាទំនាស់ដីធ្លី ដែលជាអាយុជីវិតរបស់រាស្ត្រខ្មែរ។ តាមរយៈសកម្មភាពនេះ គេបានមើលឃើញនូវជំហរចំនួន២ដែលផ្ទុយគ្នាស្រឡះ ទីមួយគឺជំហរ របស់គណបក្សកាន់អំណាចបច្ចុប្បន្ន ដែលកំពុងធ្វើសព្វថ្ងៃ លើការការពារប្រជាពលរដ្ឋ ។ កន្លងមកទោះបីមានការទទូចជាញឹកញាប់ដើម្បីឲ្យរដ្ឋាភិបាលធ្វើការសំរេចចិត្ត ដោយបញ្ជៀសផល ប៉ះពាល់ដល់ប្រជាពលរដ្ឋ ពោលគឺជម្រុញឲ្យការអភិវឌ្ឍមានការចូលរួមពីប្រជាពលរដ្ឋ ប៉ុន្តែផ្ទុយ ទៅវិញនៅពេលដែលមានការអភិវឌ្ឍ បែរជាសង្គេតឃើញប្រជាពលរដ្ឋរងគ្រោះដោយការបាត់ បង់ដីធ្លីផ្ទះសំបែង និងមុខរបរទៅវិញ ហើយវាកើតមានពាសពេញផ្ទៃប្រទេស។ គេមិនដែលបានឃើញ រដ្ឋាភិបាលធ្វើការពិភាក្សា សុំយោបល់ពីប្រជាពលរដ្ឋ ដែលជាម្ចាស់ឆ្នោត ដើម្បីតំរង់ការ សំរេចចិត្តរបស់ខ្លួននោះទេ ប៉ុន្តែគេបែរជាធ្វើដោយឯកឆន្ទ ហើយមិនគិតពីផលប៉ះពាល់លើប្រជា ពលរដ្ឋទាល់តែសោះ ដែលធ្វើឲ្យពលរដ្ឋតែងក្លាយជាជនរងគ្រោះ ស្របពេលដែលក្រុមហ៊ុន របស់អ្នកមានអំណាច និងក្រុមហ៊ុនខិលខូចមួយចំនួនទទួលបានផលដ៏សន្ធឹកសន្ធាប់ពីការ អភិវឌ្ឍនោះ ។
ជំហរមួយទៀតគឺជំហររបស់គណបក្សសមរង្ស៊ី ទីណាមានទុក្ខទីនោះមានតំណាងរបស់គណបក្ស សម រង្ស៊ី ។ ជាញឹកញាប់តំណាងរបស់គណបក្ស សម រង្ស៊ី តាំងពីថ្នាក់លើដល់មូលដ្ឋានតែងបាន យកចិត្តទុកដាក់ចំពោះការរស់នៅរបស់ប្រជាពលរដ្ឋ ។ ទោះបីគណបក្សសមរង្ស៊ីមិនទាន់បាន អំណាចនៅក្នុងដៃ ក៏ដោយប៉ុន្តែតំណាងរបស់គណបក្សនេះបានធ្វើសកម្មភាពគ្រប់ទីកន្លែង ពិសេសនៅពេលដែលប្រជាពលរដ្ឋជួបរឿងអយុត្តិធម៌ ។ ដោយអនុវត្តយ៉ាងខ្ជាប់ខ្ជួននូវគោល នយោបាយ និងឆន្ទៈរបស់ថ្នាក់ដឹកនាំគណបក្ស ពិសេសលោកប្រធាន សម រង្ស៊ី ដែលជាវីរជនស្នេហាជាតិនោះ តំណាងរបស់គណបក្ស សម រង្ស៊ី បានបំបែករាល់ឧបសគ្គ ដែលត្រូវបានបង្កើតឡើងដោយអ្នកមានអំណាចបច្ចុប្បន្ន ដោយមិនមានការភ័យខ្លាច ពោលគឺអនុវត្ត ជំហរការពារប្រជាពលរដ្ឋដាច់ខាត និងត្រូវតែប្រឆាំងចំពោះរាល់គំរោង ដែលធ្វើឲ្យជះផលប៉ះពាល់ដល់ពល រដ្ឋជាម្ចាស់អំណាច ។ ការធ្វើសកម្មភាពដោយការប្តេជ្ញាចិត្តខ្ពស់នេះហើយបានធ្វើឲ្យគណបក្ស សម រង្ស៊ី ក្លាយជាក្តីសង្ឃឹមតែមួយគត់របស់រាស្ត្រខ្មែរ ៕ កង ប៊ុន
